Jokoaren funtsa da Euskal Herriko eta munduko tokiak, irudi panoramikoz erakutsiak, mapa batean identifikatzea. Puntuak lortzen dira segun gertutasuna eta azkartasuna, eta horrekin sailkapenak osatzen dira (egunekoa, astekoa eta hilabetekoa), orokorki zein taldeka. Geoguessr edo Openguessr bezalako mapa-jokoekin antza du Tagzaniak, baina edukia zaindu egin da, errepide galduak izan beharrean, Euskal Herriko eta munduko toki esanguratsuak dira Tagzanian erakusten direnak: Wikipediako datu libreak berrerabili dira tokiak identifikatzeko, eta emaitza ikustean, erabiltzaileak eskura izango du euskarazko Wikipediako esteka, toki bakoitzaz gehiago jakiteko. Aplkikazioa hurrengo estekan deskargatu dezakezue:

• Android
• iOS

Aplikazioaren garapena Eusko Jaurlaritzak eta Gipuzkoako Foru Aldundiak lagundu egin dute.

Tagzania, aspaldiko marka

App berriaren Tagzania izena ezaguna suerta daiteke batzuentzat, 2005. urtean martxan jarri zen mashup 2.0 proiektu bat izan zen. Erabiltzaileek mapa batean nork bere erreferentziak gordetzeko webgune bat izan zen, CodeSyntax-ek sortua, tag edo etiketetan oinarritua (web 2.0 aroko beste kontzeptu ezagun bat izan zen tag edo folksonomiena).

Milaka erabiltzaile erregistratu eta zenbait hizkuntza bertsio izatera iritsi zen Tagzania; baina Google Maps zerbitzuak, beste mashup batzuen kasuan bezala, bere gain hartu zituen beste batzuek egindako funtzionalitateak eta, are gehiago, Internet mugikorraren garapenak webgunearen erabilgarritasuna gutxitu zuen. Azkenean, 2020an itxi genuen Tagzania hura… Orain beste kontzeptu eta zerbitzu batekin berpiztu dugu izena ordea.

CodeSyntax eta gamifikazioa

Aplikazioak eta jokoak garatzen eta gamifikazioan eskarmentua du CodeSyntax-ek. Aipaturiko Egunean Behin aplikazioaz gain, bezeroentzako app/jokoak ere garatu ditugu. Appa Zarautz, Gurot edo Appa Hi dira adibide batzuk.

Egunean Behini dagokionez, martxa betean jarraitzen du jokoak 6 urte bete berritan (martxo honetan hain zuzen). 17. denboraldian dago lehia, Euskaraldiak eta Eusko Jaurlaritzako Kultura eta Hizkuntza sailak babestutako sasoi bat, zeinean dagoeneko 52.000 lagunek baino gehiagok jokatu duten.

Beste aplikazio horiek bezala, iOS eta Android sistema eragileetarako dago prest Tagzania. Instalatu eta probatzera gonbidatzen zaituztegu, jokoa hobeto ezagutzeko, helbide honetatik: https://tagzania.com

Tagzania: mundua ezagutzeko modu berria!