PloneGov Europako eGovernment sarien finalean
2009/08/28
Europako Batzordeak 2009. urteko European eGovernment Awards sarietako 52 finalistak ezagutzera eman ditu orain gutxi. Sari hauetan hainbat atal daude eta horietako batean, "eGovernment enabling administrative efficiency and effectiveness" delakoan, PloneGov ekimena aurki dezakegu.
PloneGov nazioarteko e-administrazio ekimena da, software librea erabiliz eta software libreko ekimenekin lotuz, administrazio guztientzat baliagarriak izan daitezkeen oinarrizko garapenak egin eta udal administraziorako software libreko oinarrizko plataforma bat lantzea duelarik helburu gisa. Urte hauetako lanari esker hainbat sari jaso ditu PloneGov ekimenak.
CodeSyntax-ek PloneGov ekimenean parte hartzen du bere UdalPlone soluzioarekin. Gure inguruko hainbat udaletxeren webgunea garatu dugu UdalPlone erreminta erabiliz, horra adibide modura Amorebieta-Etxano, Zumaia, Ondarroa, Elgeta edota Mutrikuko udalenak.
European eGovernment Awards-eko sari banaketa azaroaren 19an egingo da Suediako Malmö hirian.
