2025/04/01
Pozik iragartzen dugu MAK21 ikerketa-proiektuaren amaiera arrakastatsua. CDTI-k diruz lagundutako proiektu hau bost enpresek osatutako partzuergo batek garatu du: Industrias Puigjaner (DENN), DIMECO, ASAI, RISKLESS eta CODESYNTAX. Enpresa hauek, makina-erremintaren eta teknologia digitalen sektoreetako adituak, elkarlanean aritu dira ekimen honen garapenean, bakoitzak bere espezializazio-esparrutik ekarpen garrantzitsuak eginez.

MAK21 proiektuaren helburua industria-ekipamendu adimendunak, autonomoak eta erresilienteak garatzea izan da, teknologia digitalak aplikatuz. Helburu hauek lortzeko hiru ardatz nagusi ezarri dira:

  1. Fabrikazio eraginkorra eta iraunkorra bermatzea: Makina-erremintaren sektorean produktibitatea handitzea eta lehengaien kontsumoa murriztea funtsezko helburu bihurtu dira. Proiektuaren bidez, makinak baliabideak optimizatzeko gaitasuna eskuratu du.

  2. Makinaren eta pertsonaren arteko interakzioa sustatzea: Erabiltzaileen esperientzia errazteko, makina eta pertsonen arteko komunikazioa hobetu da teknologia berriak erabiliz, hala nola, errealitate areagotua eta adimen artifiziala.

  3. Zibersegurtasuna eta erresilientzia hobetzea: Makina-erremintaren inguruko segurtasuna indartu da, egungo mehatxu informatikoen aurrean babesteko mekanismoak ezarriz.

MAK21.png

Proiektu honek 1.790.925,00 euroko aurrekontua izan du, eta Europar Batasuneko Berreskuratze eta Erresilientzia Mekanismoaren bidez finantzatu da. Industria 4.0-ren paradigma digitala oinarri hartuta, eta Industria 5.0-ren ikuspegitik jasangarritasuna, pertsona-eremua eta erresilientzia txertatuz, MAK21-k industriaren etorkizuna moldatzen lagundu du.

Proiektuan parte hartu duten enpresen eta ikerketa zentroen  (Industrias Puigjaner (DENN), DIMECO, ASAI, RISKLESS eta CODESYNTAX, eta TECNALIA) arteko lankidetza estuak arrakasta bermatu du, eta ezagutzaren transferentzia erraztu du sektoreko hainbat esparrutan.

Eskerrik asko proiektuan parte hartu duten enpresa guztiei eta euren ekarpen baliotsuei. Aurrera begira, sortutako ezagutzak industriaren digitalizazioan eta garapenean laguntzen jarraituko du!

CDTI-logoak.png

Agian interesatuko zaizkizu beste artikulu hauek