Kudeaketa Aurreratua EUSKALIT-en eskutik: berrikuntzak eta estrategiak
Kudeaketa Aurreratuaren Ereduak lehiakortasunean beharrezkoak diren hobekuntzak bilatzen enpresak orientatzea du helburu, azken hamarkadetan hainbat esparrutatik ekarritako kudeaketa-kontzeptuak bateratuta: ezagutzaren kudeaketa, erabateko kalitatea, bikaintasuna kudeaketan, berrikuntza eta enpresen erantzukizun soziala, besteak beste. Erakundeen kudeaketa hobetzeko asmoz, Kudeaketa Aurreratuaren Ereduak (hemen dokumentua .pdf formatoan) aldaketa batzuk jaso ditu azken urtean, oso-oso labur esanda, honako hauek:
Estrategia arloan, "Asmoa" (purpose) kontzeptua gehitu da, erakundeen misioaren eta ikuspegiaren osagarri gisa, erakundeen helburu estrategikoak eta kultura korporatiboa indartzeko. Hau da, enpresak ez soilik zer egin behar duten, baizik eta zergatik egiten duten azpimarratuz. Bereizketa kontzeptua ere indartu egin da, lehiakortasuna eta berrikuntza hobetzeko asmoz
Bezeroak atalean, bezeroaren esperientzia eta bidaia erakundean oinarritzen da orain, segmentazioaren garrantzia eta interakzio-puntuak azpimarratuz. Hau da, bezeroarekin harreman zuzenagoa eta pertsonalizatuagoa izateko aukera ematen duena, beren beharretara hobeto egokituz
Gizartea eta Ingurumen atalean, Garapen Jasangarrirako Helburuak (GJH) eta Ingurumen, Gizarte eta Gobernantza (IGG) kontzeptuak gehitu dira. Hauek gero eta garrantzitsuagoak dira erakundeetan, eta konpromiso soziala eta ingurumenarekiko erantzukizuna azpimarratzen dituzte. Helburu hauetan, erakundeen jarduera eta estrategiak iraunkorragoak eta gizartearekiko konektatuagoak izatea bilatzen da
Pertsonak arloa ere berrantolatu da, talentuaren kudeaketa eta belaunaldien arteko errelebo-prozesuak indartuz. Honek gero eta garrantzi handiagoa du, lanaren eta bizitza pertsonalaren arteko oreka hobetzea eta aniztasunari erantzutea bilatzen baitu. Lan modu desberdinak kudeatzeko beharra nabarmentzen da, pertsonalizazioa eta ekitatea sustatuz
Berrikuntza arloan, Oslo 2018 eskuliburuarekin lerrokatzea nabarmentzen da, produktu eta zerbitzuen berrikuntza indartuz. Hau da, erakundeen eskaintza berritu eta hobetu dezaten, bezeroen eta merkatuaren behar aldakorretara egokituz
(hemen aldaketa garrantzitsuenak biltzen dituen .pdf dokumentua)
Gure enpresa, CodeSyntax, Kudeaketa Aurreratuaren Ereduaren aplikazioan aktiboak izaten saiatzen gara. Izan ere, gure lana eta konpromisoa Euskaliten Kudeaketa Aurreratuko "A" Aintzatespena jasotzearekin saritu izan dira. Gure enpresak ere Kudeaketa Aurreratuko Klubean parte hartzen du, eta ebaluaketa klubean aktiboki laguntzen dugu, Euskalit-en laguntzarekin. Hori guztia gure webgunean zehatzago azaldu genuen: CodeSyntax-ek Kudeaketa Aurreratuko "A" Aintzatespena jaso du.
Laburbilduz, Euskalit-en Kudeaketa Aurreratuaren Ereduaren azken eguneraketek erakundeen kudeaketa modernoagoa eta eraginkorragoa bultzatzen dute, aldi berean gizartearekiko eta ingurumenarekiko erantzukizun handiagoa hartuz. Gure enpresak, teknologia eta software garapenaren alorrean, aldaketa hauek gure eguneroko jardueran eta bezeroekiko harremanetan txertatzen saiatuko gira, gure zerbitzuen kalitatea eta eraginkortasuna hobetuz.
