Euskarazko zerbitzu gida
Atzo iluntzean Seguran izan nintzen Iparra-Hegoa ekitaldian parte hartzen, Eneko Bidegainek moderatutako elkarrizketara gonbidatuta. Hasteko eskerrik asko han jasotako harrera oparoagatik.
Helburua zen Iparraldeko eta Hegoaldekoen artean sarea sortu eta harremanak bultzatzeko euskarazko zerbitzu gida baten inguruan hausnartzea. Hau da, Baionara joatean jakin ahal izatea zein ostatutan atendituko gaituzten euskaraz edo Gasteizen zein okindegitan erosi dezakegun euskaraz ogia.
Hainbat aportazio egon ziren gaiaren lehentasunaz, praktikotasunaz, interesaz edo zein aktoreren teilatuan dagoen auzia.
Hor nik ere baditut nere zalantzak, Googleren edo antzerakoen nagusitasunarekin borroka egin behar bait da. Baina errealitatea da datubaseak sortzen ari garela, beraz hortik nire mezu nagusia bi puntutan izan zen:
Proiektuen fragmentazioa
Batetik, ez dugula proiektu gehiago behar. Lehendik ere baditugula honelako proiektu gehiegi, antzerako interesekin edo aldaketa txikiekin honetara bildu daitezkeen proiektuak. Boteprontoan bururatzen zaizkidanak: Kontseilua, Gaindegia, Tokikom, CodeSyntax, udal gehienek, garapen ajentziek, Jaurlaritzak, Arartekoak edo Udalbiltzak. Denak ari dira nolabaiteko zerbitzu gidak sortuz, bakoitza interes partikular batzuekin baina modu berean aldaketa txikiekin bateragarriak izan litezkeenak. Denek dituzte datubasea eguneratzeko arazoak (aurrekontu falta) eta erabiltzaileok ez dugu emaitza osoa emango digun datubase bat inon. Unibertsalitatera gehien gerturatzen dena Google Maps izango da, baina hark ez du euskararen informaziorik ematen, eta ez dago informazioa esportatu eta berrerabiltzeko modurik.
Proiektu bat beharko genuke beraz, datubase bakar bat denon artean aberastu dezakeguna.
Soluzio tekniko internazionalak berrerabili
Wikipedia aipatu zen eredu moduan, nola txiki-txikitik hasitako proiektu batek lortu duen nagusitasuna eta nola gaur egun proiektuari babesa ez den erakundeen aldetik zalantzan jartzen (Biba! Behingoz euskararako proiektu estrategiko batean adostuko ote dute babesa hiru administrazio nagusiek?)
Nik planteatu nuen ez dugula soluzio tekniko bat asmatu behar, datubase berri bat ez dugula sortu behar. Badagoela, eta OpenStreetMap izena daukala.
OpenStreetMap-en mila motatako informazioa jarri, mantendu eta kontsultatu daiteke. Aurreko batean Baserrietarako bideetaz aritu nintzen, baina denetik dago: distribuzio elektrikoa, bidegorrien sareak, ondare kulturala, ur azpiegiturak... eta zerbitzu eta negozioak. Itxura batean mapa bat da, eta egia esan hori da aurpegi nagusia, baina horrek ez gaitu itsutu behar, askoz gehiago da OpenStreetMap.
- Mapak eta informazio geografikoa gorde eta berrerabiltzeko sistema da. Datu biltegi mundial bat.
- Wikipediaren moduan, edonork editatu eta gehitu dezake informazioa.
- Eguneratutako informazioa erauzi, filtratu eta berrerabiltzeko modu anitzak eta automatizatuak daude.
- Norberak datu horiekin webgune, aplikazio, ikerketa edo nahi duena egin dezake, bere itxura edo identitatea jarriz (beti ere datuen jatorria aipatuz).
Adibide azkarra: euskarazko zerbitzuak etxe alboan
5 minutu behar izan ditut ni bizi naizen kalean euskaraz egiten duten zerbitzuak identifikatzeko, eta horretarako ondoko etiketa jarri diot bakoitzari:
language:eu=yes
Honekin bakarrik eta datuak filtratzeko Overpass Turbo erabiliz lortu dut euskarazko zerbitzuen mapa. Gainera, nahi badugu datuak JSON edo beste formatu batzuetan esportatu eta berrerabili ditzakegu (JSON formatuan hementxe), telefonorako APP bati jaten emateko, udal webgunean publikatzeko, ikerketa baterako edo nahi dugunerako.
Orduan zer? Elkarrekin kolaboratu dezakegu? Egingo dugu datubase bakar eta aberats hori?
