Euskal Herriko mendien APPak inoizko daturik onenak izan ditu 2024an #MendiakAPP
2016ko udazkenean kaleratu zuen CodeSyntaxek Mendiak APP, Euskal Herriko mendien aplikazioa. Batez ere bi dira aplikazio honen helburuak. Batetik, Euskal Herriko mendien informazio nagusia ematea mendizaleei (mendien zerrendak, mapak, informazioa...). Bestetik, mendizaleei erreminta erraz bat eskaintzea bere mendi-igoera guztiak gordetzeko (zein mendi igo duen, noiz, zenbat aldiz, igoeren argazkiak, estatistika historikoak eta abar).
Bada, 2024an inoizko erabilera-daturik onenak izan ditu gure aplikazio honek. Eta oso pozik gaude, gehienetan aplikazioa garatzea baino zailagoa baita bizirik mantendu eta erabiltzaileen erabilera handitzen joatea.
2024. urtean zehar 38.200 igoera berri markatu dira Mendiak APPean (30.000 inguru GPS bidez zertifikatutakoak) eta 29.800 argazki gehitu dira gure datu-basera. Aurreko urteekin alderatuta %50eko igoera adierazten du marka berri horrek, 2020az geroztik, batez beste, 25.000 igoera berri gehitzen zirelako urtero.
Hilabeterik onenak apirila, uztaila eta azaroa izan ziren (3.500 igoeratik gora, hilero, batez beste) eta erabiltzaile berri gehien ere uztailean jaso genituen. Erabiltzaileen artean %4 dira kontua pribatuan dutenak eta, esan bezala, GPS bidez zertifikatu ditugun igoerak ia %80 izan dira, hori ere inoizko markarik altuena, aurrekoetan %70-75 artean baitzegoen zertifikatuen kopurua.
CodeSyntaxek bere barne proiektuen artean garatu zuen laster 10 urte beteko dituen app hau eta gure garapenen artean estrategikotzat daukagu, Egunean Behin edo Appa Hi! ditugun bezalaxe. Horregatik, garatu ez ezik, urte guzti hauetan berrikuntza tekniko, diseinu aldaketa eta erreminta berriak gehitu dizkiogu aplikazioari, betiere mendizaleei gero eta erabilera-esperientzia hobea eskaintzeko eta ahalik eta tresna erabilgarriena aurkezteko. Gure blogean aurkituko duzu eguneraketa horien guztien inguruko informazioa, besteak beste azken hilabeteetan egin ditugun eguneraketa teknikoetako batzuk, sortu ditugun erronka berriak edo 2024an mendizaleentzat atera ditugun kamiseten inguruko informazioa.
Hamar urte hauetan 60 bertsio-eguneraketa baino gehiago argitaratu ditugu Android zein Apple dendetan. Seguru asko etengabeko eguneraketa eta hobetze-prozesu horri esker izan da 2024ko arrakasta; lantalde osoak ezin hobeto egindako lanaren emaitza.
Mendiak APPak hasiera-hasieratik izan zuen oso harrera ona eta euskara hutsean sekula garatu diren aplikazioen artean deskarga gehien izan dituzten app-en zerrendan dago (30.000 deskargako muga aspaldi gaindituta). Zorionez, 2024. urtea ez da salbuespena izan eta inoizko daturik onenak izan ditugu bukatu berri den urtean. Eusko Jaurlaritzaren zein Gipuzkoako Foru Aldundiaren babesa jaso du urte hauetan, bai hasierako garapenak egiteko zein urtero-urtero egiten ditugun eguneraketak bideratzeko ere. Gainera, garapen zehatz batzuetan Gipuzkoako Mendi Federazioa ere izan dugu bidelagun. Eskerrik asko, beraz, den-denei euren babes eta laguntzagatik.
