57.000 lagunekin osatu da Egunean Behinen 17. denboraldia

Denboraldiko irabazleak Esther (Gasteizkoa), Bortuko Manexa (Uztarrozekoa) eta hirugarren Pottoka (Oiartzungoa) izan dira. Telebista adimentsua jasoko du lehenak, eta Android euskaratua duen telefono bana bigarrenak eta hirugarrenak. Beste bi jokalarik zozketa bidez haririk gabeko aurikularrak jasoko dituzte (Myriam eta Bartu). Sariak eskaini ditu, Euskaraldiaren izenean, Eusko Jaurlaritzako Kultura eta Hizkuntza Saileko Hizkuntza Politikarako Sailburuordetzak.

Denboraldi honetan 57.000 lagun aritu dira jokatzen eta guztira 2,4 milioi partida jokatu dira. Babesle nagusia Euskaraldia izan da eta asteko babesleen artean Euskaber (baserriko zuen arrautzak), TAUPA Mugimendua, TOKIKOM (Euskal Hedabideen Elkartea), Koparia (Merchandising eta opari promozionalak), SPRI Taldea, Goa!zen telesailaren aldizkari ofiziala, Tagzania eta CodeSyntax izan ditugu.

Hurrengo denboraldia, jokoaren 18.a, maiatzean aktibatuko da. Ahal dela, Maiatzaren Leheneko zubia igaro ondoren nahi genuke. Edozelan ere, Euskaraldia denerako (maiatzaren 15etik 25era) egongo da jokoa martxan, seguru.